SUN微博：打橫嚟講：向振英哥推薦人才

睇元朗村民保家衞園英勇抗敵的新聞後，頓替候任特首梁振英高興。

梁振英日以繼夜，夜以繼日，早出晚歸，擔櫈仔到各區親征，慘過送外賣，都係想尋找高人埋班，匡扶佢統領江山，一展愛國救港理念啫！

嗱！家陣，有好嘢嘞！大棠荔枝山莊牌坊下，眾義士手持木棒刀具列陣，氣勢縱橫，媲美水滸英雄，更勝吳廣，遇車拆車，見人潑屎，要你企直入嚟，打橫出去，真係勇者無敵。

如果梁振英真心渴求良才，這群好漢確實經典精選，世間難得，尤其是其首領梁姓賢達，其戾橫折曲、顛三倒四的詭辯，贏曾鈺成九條街啦！加上，其高飛曲墜的飛機頭髮型，襯一身飄逸不羈白衫白褲白皮鞋，令人記起香港最美好的七、八十年代，暑氣全消！如斯一代良將，邊度搵？

仲有呀！梁頭目除樣好台型正之外，武略更堅挺，佢手下淋糞組，都係先禮後兵，有家教o架！喊打喊殺不果後，才潑「有機肥料」，不似香港警方唔聲唔聲便噴胡椒咁無大丈夫道義，所以，如果振英哥能請到此猛人出村，守住西環花槽，包無失拖，就算啲示威人士或採訪記者，唔直入橫出，都肯定唔只一褲都係咁小兒科！

又話林鄭好打得，收皮啦！得把口，仲話坐第二把交椅？我向振英哥推薦梁頭目嘞！起碼佢敢霸官地十八年之久，兼當煲呔嘅政府無到，與梁營理念一致，有承擔，人才也！

彭志銘

次文化考古學家，對城中潮語有深入研究，博徵博引，廢官廢人行埋一邊。

就係咁爆：荔枝山莊拆僭「欺人太甚」？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot