政壇：李國寶網上無朋友

為咗拉近同市民嘅距離，唔少立法會議員都會喺社交網站開設專頁。社區發展動力培育喺今年三月研究議員用社交網站嘅情況，發現六十位議員當中只有四分一係冇用任何網上社交平台，三個直選議員冇用網上平台同市民溝通、功能組別中就有十二個冇用，如果以建制同泛民去分，完全冇用網上平台嘅就分別有十四個同一個，即係直選議員比功能組別用得多網上平台。

煲呔專頁最「河蟹」

時事評論員黃世澤話功能組別有特定選民，唔需要吸引咁多人，況且有啲界別少選民，開咗專頁都唔知去邊度吸引佢哋。加上部分功能組別議員成日唔開會，開會又唔發言，都冇嘢可以同市民分享啦。佢仲揶揄「三點不露」、立法會大懶蟲，話：「李國寶（立法會金融界議員）唔通將佢瞌眼瞓嘅次數擺出去咩？」真係寸到爆。

不過，咪以為喺社交網站開專頁嘅議員嘅社區聯絡工作實好好呀。因為好多議員開咗個專頁後都冇管理，好似議員李國麟、李華明、梁美芬同陳鑑林等，喺調查期間都係零發貼、零回覆，好似隱形咁；又例如陳淑莊、劉健儀、陳克勤等就算有發貼都係冇乜網民覆。黃世澤就話有啲議員發貼內容太沉悶，睇完唔搵周公已經算唔錯，啲議員好應該檢討吓喎。

除咗議員外，黃世澤一提起煲呔曾嘅專頁就話睇到眼火爆，因為個專頁但凡出現反對聲音都會「河蟹」晒，搞到淨係歌功頌德咁。佢話下屆特首如果設立專頁，應該要當佢係政府1823專線咁，聆聽各界意見，市民先會有動力發貼喎！