唔想醫護係咁走 醫療庸官快早抖

舊時生不入官門，今日生不入醫院。事關本港醫療事故層出不窮，五花八門，公立醫院唔係開錯刀，就係打錯針，唔係餵錯藥，就係輸錯血。市民有命入去，隨時冇命返番出嚟，唔驚就假。

公立醫院變龍潭虎穴，正如唔少人話齋，可能原因之一就係醫護人手長期嚴重短缺。你知啦，醫護做到暈陀陀，手忙腳亂難免出錯，白衣天使變勾魂使者一啲都唔奇。最攞命嘅係，醫護荒講咗咁多年，當局一直唔嗲唔吊，任由問題惡化，簡直有病，叮！

嗱，急症室醫學會一項調查顯示，七成急症室醫護人員話有意喺一年內離職，主要不滿工作量過大同工作環境不健康。另有七成人表示，急症室無論醫生、護士同助產士都人手不足。

七成急症室醫護打算劈炮，都咪話唔得人驚！病人情況唔緊急，都唔送入急症室，前線醫護買少見少肯定耽誤搶救，流血不止冇人理都唔知點算。市民唔想打橫送入去，又打橫送番出嚟呀！

冇事冇幹好人好姐都唔會去急症室求醫啦，如果醫護人手六個蓋冚十個煲，病人眼光光捱天光，隨時小病捱到變大病，大病分分鐘變冇命，唔講得笑。

急症室醫護人手問題急需救治，當局點講呢？又係例牌嗰句，話會增聘兼職同海外醫生喎。真係急驚風遇着慢郎中，醫管局話增聘醫護人手，大大話話都講咗幾年，如果係得嘅，就唔使搞到今日咁嘅局面啦，叮爆佢個鎯鎯！

醫護人手問題十萬火急，但係招聘海外醫生遭到醫學界強烈反對，拗得嚟都天光啦。至於招聘兼職醫生，本來有得諗o架，可惜港府章法大亂，催谷醫療產業並無周全計劃，私人醫生有時間都去私家醫院搵真銀。醫管局藥石亂投，公營醫療服務唔瀕臨崩潰至奇！

其實，講嚟講去，癥結就係港府縮骨卸責，發展乜鬼醫療產業，令私家醫院大量向公院醫護挖角，所以釀成今日嘅惡果。叮佢個鎯鎯，情況再繼續落去，莫講話急症室，公立醫院所有部門醫護人員都走得就走，到時受害嘅何止係留低嘅醫護，仲有普羅市民，有錢有得醫，冇錢就等死。

所以話啫，唔想醫護係咁走，醫療庸官快早抖。候任特首梁振英要重組政府架構，計太一叮話齋，重組醫療架構，檢討醫療產業，更加十萬火急，叮！