政壇：政商定格：女童軍舞起來學優雅
女童軍高層中不乏舞林高手。嘉頓新抱兼女童軍總會名譽副會長Michelle張王幼倫近日同香港總監Josephine彭徐美雲為女童軍引入標準舞興趣章，力谷女童軍練得一身好「舞功」。
舞藝精湛嘅Michelle尋日冒雨主持興趣章啟動禮，佢話香港女仔太多「波鞋族」、「寒背族」，舉止唔夠優雅，於是同Josephine絞盡腦汁，搵嚟跳舞學校Dansinn Heavenly校長合作，開暑期班教女童軍大跳華爾茲同拉丁舞。
Josephine嘅舞齡長達十多年，老公彭曉明係御用舞伴，回想當初學舞時經常踩親老公，笑料百出，佢囝囝彭穎生都受感染，近年學跳Cha Cha，但佢自嘲記性麻麻，每次上堂都還原基本步喎。
彭徐美雲（右二）同張王幼倫（左二）鼓勵女童軍苦練「舞功」，Dansinn校長Mark（左）同Philip（右）都大力支持。
女童軍喺啟動禮上大跳拉丁舞，儀態大有進步。