政壇：立會議程「塞車」玩殘議員
出缺機制草案嘅拉布戰落幕後，好多受阻嘅會議亦湧住排番上日程表，今明兩日立會一共有二十多個委員會會議進行。以今日為例，由八點九至下午四點半，整日四個時段，一共有八個委員會會議舉行，其中兩節有三個會議同時進行。
要講到重頭戲一定係聽日直落共十四個委員會會議，唔少議員一日要連踩三至五個會，真係唔知應該去邊個會好。
三個會都有份嘅白鴿黨涂謹申就好淡定咁話，啲會撞晒都冇辦法，惟有黨友間協調得好啲，去得幾多得幾多啦。另一邊廂，建仔嘅李慧琼同黨友仲未傾掂數，而佢亦正為今、明兩日共七個會議嘅走位而苦惱。新民黨葉劉淑儀尋日就喊晒口咁話，預計未來兩日緊湊嘅議程將會好辛苦，分分鐘要日日朝九晚六，雖然佢上星期五已由美國返港，但到依家都仲未適應到時差，所以現時情況非常大鑊。