政壇：鄉紳撐陳強出戰新界西
九月立法會換屆選舉，盛傳出戰新界西直選嘅城鄉會會長陳強本身熱愛體育活動，唔講唔知，原來佢仲係本地甲組球隊屯門嘅會長，尋日係今季煞科戰，佢拉埋家人出席支持，仲科水兩萬幾蚊派飲品同食物畀入場睇波嘅球迷添！
陳強淨係社區服務中心都已經自己出錢開咗六間，佢話雖然喺內地有生意，但近年已處於半退休狀態，大部分生意已交晒畀仔女負責，自己就大部分時間投入地區工作，得閒啲就約班老友踢衞生波。
坊間盛傳，佢已得到大部分元朗區嘅鄉紳支持佢出選立法會。佢尋日話上述只係傳聞喎，因為未落實，所以冇乜可以講住。不過，如果市民街坊真係認同佢嘅工作，佢又當選的話，佢一定會全身投入，報答支持者。
陳強（右一），尋日趁煞科戰同班球員打氣，開賽前仲同球員握手添。