政壇：選傑青肥亨寸高官無影
第四十屆「十大傑出青年選舉」尋日開始接受提名，現場仲見到獲邀做評審嘅前商務及經濟發展局局長馬時亨同財務匯報局主席Sophia高靜芝。肥亨致詞時話呢個選舉充滿正能量，好應該得到政府支持，但係佢出席兩屆以來，從來未見過一個高官出現過，令佢好失望。咦！佢似係暗寸高官唔夠勤力喎。
肥亨意有所指話香港有好多選舉，大部分都有好多醜聞，只有呢個傑青選舉發揮正能量，候任特首CY梁振英都係傑青之一。可惜選舉一直得唔到高官現身「給力」，所以佢希望CY上任後，幾忙都要出席呢個選舉。
Sophia下周將去美國羅省，探望高齡母親同兄弟姊妹。講到外遊，佢笑言從未坐過郵輪，因為工作太忙夾唔啱時間。
馬時亨（左）同高靜芝係多年老友，一路行一路雞啄唔斷。