政壇：絕食反拉布劉健儀捉蟲

雖然立法會就出缺機制草案嘅拉布戰經已告一段落，但如果細心回顧建制派喺呢場抗拉布戰中嘅行徑，唔難發現幾位有意九月立法會選舉落戶港島區嘅建制派議員都不約而同「做番啲嘢」博表現，由此可見港島區選情係幾咁波譎雲詭。

最傷嘅睇怕都係富貴黨。有意由功能界別轉戰港島嘅黨主席劉健儀，今次竟然走上最前線，同黨內嘅青年團一齊絕食三十小時，事後因為冇食血壓藥嘅關係，差啲搞到中風。玩絕食呢家嘢，犧牲咁大，但換來嘅只係坊間嘅陣陣恥笑，既反響唔大，搶唔到分之餘，亦突出唔到富貴黨嘅形象，絕對係名副其實嘅「捉蟲」。

表現不如王國興

起初大家都唔係好明，劉健儀做乜絕食會搞到中風咁誇張，事實上一啲都冇誇張，如果佢身體健康冇病痛嘅話，絕食三十粒鐘本應冇乜事嘅。之不過，或者因為佢絕食嘅經驗少啦，期間竟然連血壓藥都唔食，最終搞到要送入醫院，事後仲要畀人懷疑「扮可憐」，實在係得不償失。

相反另一港島戰將、工聯會王國興就唔同，由第一日開始不斷用毛筆寫大字，又一度將大字貼出會議室外牆上，會議期間更多次出口批評立法會主席曾鈺成太過「縱容」泛民議員，不斷要求對方裁決，種種表現，都令到建制派支持者刮目相看，呢啲好明顯亦係為咗爭出位。

至於突然「剪布」嘅曾鈺成，呢幾日不停解畫都未能就同建制派議員「預謀」洗底，仲有泛民議員話要向佢提不信任動議添！博乜？大家心知肚明喇！建制派爭出位爭到血淋淋，可見九月嘅選舉會有幾激烈。