拉布剪布鬥不停 香江亂象何時休

程尋磨較叉燒包，蹉跎歲月攞嚟搞。大家應該識得玩包剪揼遊戲，包贏揼，揼贏剪，剪贏包，勝負純粹靠撞。近日立法會上演拉布及剪布鬧劇，愈睇愈似政壇包剪揼，完全無譜，唔止亂七八糟，而且後患無窮。

嗱，反對派議員玩拉布做包，建制派議員突襲破局做剪，立法會主席擔任裁判做揼，猜來猜去不分勝負，最終鬧上法庭。議員梁國雄就主席曾鈺成終止議席出缺安排草案辯論提出司法覆核，雖然高等法院拒絕受理，但問題未解決，今次只不過係序幕咋，戲肉陸續有來吖。

議事堂本來係莊嚴嘅場所，依家搞到烏煙瘴氣，七國咁亂，好似大笪地咁，簡直係國際大笑話。一時拉布，一時流會，一時剪布，一時司法覆核，都唔知呢班政客究竟想點。最無奈嘅係小市民，被迫睇鬧劇，想耳根清淨都唔得。

話時話，拉布係議員嘅權利，合法合憲，無可厚非，所以咯喎，如果下次有人食過翻尋味，繼續玩拉布，亦冇人可以阻止。呢次揮剪破布已經搞到一鑊泡，下次又點吖？唔通鋪鋪都搵法官大人定奪咩？係咁，行政、司法、立法三權分立咪得個噏字，到頭來，遲早玩死香港嘅咋！

天下本無事，庸人自擾之。香港出現今日嘅亂局，淪落到咁嘅地步，始作俑者正正就係特衰政府。議員出缺安排迫切性唔大，爭議性唔小，與其夾硬闖關，點解唔靈活變通，先安排審議其他關乎民生、經濟等爭議較小嘅議案呢？唔怪得有人話煲呔曾政府靠害，變相鼓勵議員拉布，阻撓下屆政府嘅架構重組方案，真係冇講錯。

試諗吓，如果煲呔曾政府唔係縮骨卸責，施政拉布，無所作為，倒行逆施，反對派又點可能有機可乘吖。煲呔曾到底係政治低B，定係別有用心，佢自己最清楚。正如有人話齋，奮鬥到最後一分一秒係假，靠害到最後一分一秒就真！

小人之心，不可不防。煲呔曾就快收工，表面上積極配合下屆政府，實際上不斷搞小動作，咪話太一叮唔提醒下屆政府，千祈要提防小人吖！