政壇：搞搞政：老公最後通牒Eva徘徊仕途

現屆政府個零月後就任期告終，官場頻傳新班子名單，運輸及房屋局局長鄭汝樺（Eva）榜上無名，而佢亦多次講自己去留係睇家人意見。尋日Eva出席一個電台節目時，佢就繼續模棱兩可，話人生去到分岔路口，要睇清楚行邊條路，但就加強緊急性，話「已接到老公發出嘅最後通牒」，一定要盡快決定去留喎！

講到工作，Eva話佢之前都回應過，如果再做落去，一做就係五年，意思係日子唔短。而佢覺得人生已到分岔口，所以同屋企人傾過。佢直言，老公亦向佢發出最後通牒，所以要做抉擇。不過，新班子榜上冇名，外間難免揣測多多，Eva尋日都特登強調，留唔留低唔係關乎邊個做下任特首，又或者有冇得做司長嘅問題。咁到底留唔留任呢？佢仍然唔講，只係好風騷咁話大家之後就會知。

講咗一堆欲蓋彌彰嘅說話後，Eva又不忘吹噓自己嘅政績同撐吓新政府，佢話如果下屆政府想有更好嘅架構，佢都會支持喎。