政壇：Miriam田二少立會爆口水戰

富貴黨主席劉健儀（Miriam）被傳會喺九月嘅立法會選舉中，空降港島區參加直選，尋日佢就政府新架構問題，疑似向可能都喺港島區出選嘅新民黨灣仔區議員黃楚峰開火，搞到新民黨副主席田北辰（田二少）都要幫手解畫。

立法會尋日就新政府架構重組方案舉行公聽會，新民黨拉大隊到場，以爭取曝光機會。田二少話原則上支持方案，但擔心會「畫虎不成反類犬」，因為工作可能積壓喺司長身上。黃楚峰跟住接力，質疑重組有無迫切性，因為重組一年要多花七千二百萬元，等於貪曾住一千三百次總統套房。

Miriam立即質疑黃楚峰之說，批評新民黨支持重組方案但又提出質疑，「你哋個心想佢（梁振英）點做？」黃楚峰未及開口，田二少就挺身駁斥：「擔心並不表示我哋反對或有答案點做，作為開放嘅政黨應該聽候任辦闡述理念。」呢場交鋒因為發言時間到而煞停，但港島區就似乎激戰免不了。