政壇：CY食粟米掃逾千元貨
候任特首梁振英（CY）當選後頻頻落區，去到邊都有食神，食嘅嘢仲五花八門，由咖喱魚蛋、白糖糕到雲吞等，尋日佢先後去咗元朗同天水圍，仲專登去錦田一個有機農場參觀，佢即場摘下有機粟米試食外，離開前更自掏腰包為有機農場打氣，用咗一千二百蚊買咗百幾條粟米。
自言要做「親民特首」嘅CY落親區，都唔介意喺地區「醫肚」，有時仲去到邊食到邊，尋日佢一身便裝落元朗錦田嘅有機農場粟米田時，無懼呢幾日落雨，粟米田有泥濘，冇換水靴就親自落田摘粟米品嘗，之後又飲粟米水，為有機耕作打氣。事後好客嘅農場主人想送一籃有機蔬果畀CY，但佢婉拒農場主人嘅好意，寧花一千二百蚊買咗一百二十條有機粟米搬返屋企。
CY參觀元朗錦田有機農場粟米田時，親自落田摘粟米品嘗。