政壇：陳啟宗唐唐狹路相逢

特首選舉結束近兩個月，梁營核心、身兼亞洲協會香港分會主席嘅陳啟宗（Ronnie），尋日喺前身係軍火庫、位於金鐘正義道嘅亞洲協會分會舉行講座，講到特首選舉時，又寸競選人之一唐唐背後嘅人係「狼」，仲意有所指咁話，做人即使行得正、企得正都可能遇到抹黑。佢呢頭啱啱講完，轉過頭就喺自己主場撞到去分會餐廳食晏嘅唐唐，兩個人大方打過招呼後，唐唐冇耐就離開餐廳。

由新民黨立法會議員葉劉淑儀做主席嘅匯賢智庫學苑，尋日原定喺灣仔小童群益會搞咗個題為「中港融合」嘅講座，仲請咗Ronnie做講者，點知Ronnie臨時建議改喺亞洲協會舉行。Ronnie喺講座中提到做人要行得正、企得正，但隨即引特首選舉為例，話行得正都會遇到人抹黑，佢話自己識咗梁振英多年，喺佢眼中，唐營後面嘅人至係「狼」。

唐太精神奕奕心情靚

既然講座移師佢嘅主場，Ronnie演講後就帶同一眾參加者參觀大樓，行到大樓內嘅「AMMO」西餐廳門口時，忽然見到唐唐行出嚟，兩營首領狹路相逢，一時真係唔知講咩好，Ronnie即刻打破冷場，問唐唐餐廳啲嘢好唔好食，又向在場人士介紹唐唐係「前任司長」，當時睇怕冇人唔識唐唐啩？尷尬淺談後，兩人都好快各有各行。

其實，唐唐尋日係同太太郭妤淺及家人一齊食晏，佢話因為識得間餐廳嘅大廚，所以特登嚟捧場。但佢尋日下晝仲要出席講座，所以要趕住返屋企睇資料。唐太就坐多陣，但冇幾耐都離開餐廳。一身鮮色春裝嘅唐太精神奕奕，心情亦好好，佢話天氣好要出去行吓喎。