莫道香江世情冷 幸有大愛暖人間

天地有情，人間有愛。好多人認為香港係一個物欲橫流、人情冷暖嘅城市，其實香港人一向愛心爆棚，正以各種各樣嘅善舉不斷譜寫愛心傳奇。

呢，公立醫院前日有兩位女病人去世，家人捐出死者器官，包括一個心臟、一個肝臟及四個腎臟，六位正苦候器官移植嘅病人如願以償，重燃生命希望。而上月底，一位年輕女子喺車禍中喪生，家人履行死者生前遺願，將佢嘅心、肝、腎及眼角膜器官捐出，同樣令六位病人重獲新生。

救人一命，勝造七級浮屠。器官捐贈者同家人嘅大愛，令他人生命得以延續，令其他家庭免於失去摯愛嘅痛苦，呢啲就係人性嘅光輝嘞！佢哋嘅善舉唔止獲得社會尊敬，亦鼓勵更多市民響應器官捐贈，令更多病人受惠。

係人都知，中國人比較保守，捐贈器官嘅概念仲未普及，所以近年本港簽署器官捐贈卡數字不斷下跌。資料顯示，屍體器官捐贈比率○九年曾經去到最高，每百萬人有七點五人捐出，之後就不斷下跌，舊年每百萬人得四點六人捐出，情況令人擔憂。家陣病人等候各種器官移植，平均需時五到十年，最長嘅等咗近三十年仲冇着落，唔少人等到離世都未能如願，真係諗起都心噏。正因為咁，上述捐贈器官嘅善舉更加難能可貴，更加值得讚賞。

世事無常，禍福難料。意外既然係意料之外，只能聽天由命，唔到自己左右，但器官捐贈呢樣嘢，完全可以自己話事。話時話吖，人生匆匆幾十年，赤條條來，赤條條去，如果可以幫到其他人，何樂而不為呢？既然萬般帶不走，點解唔造福他人呢？由心肝脾肺腎到眼角膜，樣樣都可以救人，功德無量！

捐贈器官等同畀咗其他病人第二生命，咁講一啲都唔誇張。呢，有位後生仔，出生嗰陣因膽管閉塞致肝臟受損，好彩有善心人捐屍肝保命，家陣已經成為網球、排球及長跑等樣樣皆精嘅運動健將，前排更獲邀參加冬季世界移植運動會滑雪障礙賽，成為首名參與呢項盛事嘅香港人添。

古人有話，勿以惡小而為之，勿以善小而不為。捐贈器官係拯救生命嘅大善事，唔止值得做，更加要做到最好。愛心影響力係無窮嘅，只因有愛，香港先至咁美麗！