政壇：政商定格：張松橋自爆藏畢加索畫
畢加索作品展喺本港舉行，尋日下晝沙田文化博物館雲集近五百名城中名人，坐擁西隧及大老山隧道經營權嘅港通控股主席張松橋被稱為「最富有嘅重慶人」，係名副其實嘅低調富豪，尋日好難得現身。佢話自己有收藏畢加索畫作，但唔喺今次展出嘅作品之中，話口未完就急急腳入場喇。
尋日天氣好唔穩定，一眾名人卻不畏風雨，名錶代理商百利建董事總經理陳正欣、社交名人周國豐及中策集團主席柯清輝等都嚟捧場，但就異口同聲話畢加索畫作價值無限，收藏唔起。入場嘅仲有前梁振英競選辦副主任、明天更好基金行政總裁鄧淑德（Karen），依家新政府組班中，但就未聽見Karen個名，佢笑稱基金工作好忙，下月仲要出訪添！
忙完特首選舉後，鄧淑德偷得浮生半日閒欣賞大師作品。
張松橋（左）同太太Cecilia都係畢加索迷。