政壇：搞搞政：麥齊光做消防局長 ?

新班子名單滿天飛，發展局前常任秘書長麥齊光被傳係未來運輸及工務局局長人選，尋日佢接受電台節目訪問後，兩度被問到係咪出任新職，佢嘅反應唔係好似其他人選咁慎言，而係寸嘴咁反問記者：「消防局（局長）呀？你講咩局呀？」做得掂政策局，唔代表可以做消防局噃，麥生遊花園嘅技巧似乎有待加強。

麥齊光一○年退休無耐，就被發展局局長林鄭月娥「睇中」，做咗四川重建小組組長，幫政府睇實捐去四川嘅九十億元重建工程。尋日佢喺節目中簡單匯報重建進度，被問到會唔會為其他更重要嘅公務而放低四川工作，以及七月可唔可以正式退休時，麥齊光話立法會批咗咁大筆錢，未搞掂就走好似唔多妥喎，言下之意係有意繼續睇實上述工作。如果佢轉任新局長，大可繼續睇實四川重建項目喇！

不過，佢好明顯唔願講未來去向，被記者再三追問下，竟然亂噏當秘笈，反寸記者係咪問佢做消防局長﹖搞到現場氣氛即時轉冷。