政壇：任宇昕紮職做騰訊三哥
今時今日，世界巨企都唔少得互聯網霸主一席，內地網絡霸主騰訊控股近年發展vv一日千里，業務愈搞愈大，尋日佢哋宣布架構重組，將現任遊戲總裁任宇昕擢升為集團首席營運官，新紮阿哥任宇昕之前主力負責QQ遊戲，今次職位三級跳，進身為集團第三把交椅，可見QQ遊戲喺集團嘅角色幾重要。
九八年先畢業嘅任宇昕，喺大學取得電腦科學與工程專業，曾經喺華為技術做過嘢，○○年加入騰訊後，最初負責遊戲開發、運營、市場銷售等工作，其後因表現良好，職位一再跳升，今次紮職後，佢喺集團嘅排名僅次於主席馬化騰同埋總裁劉熾平，佢同時兼任互動娛樂事業群總裁，繼續做番佢嘅老本行網絡遊戲，以及帶領社交網絡事業群。