政壇：副局薪高爆搶位戰

新政府管治班子正在籌組，候任特首梁振英（CY）宣布成立五人遴選委員會揀選副局長同政治助理，由於新一屆政府嘅副局長人工上調到每月二十二萬五千元，相等於問責局長薪酬七成，唔少人都有意入場。據聞身兼西九新動力及地區組織C18嘅九龍城區議員黃以謙有意應徵一試身手、而工聯會前立法會議員鄺志堅同發展局政治助理張文韜都係副局長嘅可能人選。

任職精神科專科醫生嘅黃以謙○八年已表態有興趣做副局長，但礙於當時佢所屬嘅自由黨領導層似乎無乜反應，最後連面試機會都無。黃以謙接受查詢時，無斷然否認傳聞，強調自己一向有意服務港人，又話如果真係有機會參與政策制訂，佢都會研究吓喎。

鄺志堅都係傳聞中嘅人選，據講佢有意應徵做勞工及福利局副局長。鄺志堅接受查詢時強調，至今未有人搵佢見工，亦無梁營嘅人搵過佢；至於民建聯張文韜據講獲黨推薦，有望更上層樓，由政治助理「升呢」做副局長，但由於新政府取消咗發展局，所以仲未知佢會轉投邊個政策局。