政壇：葉劉投訴KK歧視婦女

立法會議員出缺安排審議兩度流會，激進泛民更大打拉布戰，為政府護航嘅建制派議員最無奈，承擔唔起流會嘅指摘，又唔可以畀對手拖住行，連日嚟只好「被挾持」喺會議廳受拉布三子魔音纏擾，結果留守陣地派對缺席者自然有嘢講。有報道引述工聯會黃國健（KK）直指去咗美國出席囡囡畢業禮嘅新民黨主席葉劉淑儀係「建制派逃兵」，尋日葉太歸來，第一件事就係將呢隻流會黑鑊打返轉頭，仲話遲啲會去平等機會委員會投訴有人違反家庭崗位歧視條例喎！

履行母親職責

拉布戰期間，葉劉淑儀飛咗去美國出席囡囡嘅畢業禮，尋日返嚟議會幫手㩒鐘否決出缺條例草案嘅大堆頭修訂。會外，葉太好唔甘心咁大反擊，話喺美國除咗參加兩場畢業禮，仲用咗好多時間幫囡囡執行李，絕非好似某人所講話佢趁機去外國休息。

交代完美國之行後，葉太義正詞嚴咁話，對某啲同事嘅批評覺得好遺憾，仲話會去平機會投訴有關議員違反家庭崗位歧視條例喎。葉太引呢條條例，意思係自己係去履行母親照顧子女嘅職責，冇理由因為呢個神聖嘅工作畀人指摘，講起呢條例，好多人第一時間係諗到揸鑊鏟嘅家庭主婦，估唔到葉太呢啲企喺第一線嘅在職婦女都啱用。

聽到葉太咁強烈嘅回應，KK話已向葉太承認講過有關言論，又話歡迎葉太告佢，佢重申只係想提醒葉太要做好議員嘅職責。

睇番記錄，原來KK喺○九年都曾經因為應港府要求留守支持預算案，搞到無得飛去澳洲出席囝囝嘅大學畢業禮之餘，太太仲差啲要同佢鬧離婚。今次葉太面對拉布戰危機都去美國出席囡囡畢業禮，唔知KK係咪因為心有不甘先至話葉太呢？