毒菜毒薑殺埋身 最怕庸官又失魂

周一嶽，衰多鑊。呢位臭名遠播嘅食衞局局長，就快被人叮走，臨尾都要爆單僭建醜聞，呢鑊正式係醜上加醜咯。

不過咁，太一叮絕對有理由相信，僭建醜聞唔會係周一鑊嘅最後一鑊。事關佢渾渾噩噩，成事不足，敗事有餘，尤其係佢管轄嘅食環署更加烏龍百出，唔係牛肉有事，就係豬肉出事，唔係毒魚為患，就係毒菜氾濫，鑊鑊新鮮鑊鑊甘。

呢嗱嗱嗱，話口未完又有食物安全危機，今次係毒薑殺到嚟嘞。山東農民被揭發用劇毒農藥「六六粉」同敵敵畏儲存生薑，驅蟲保鮮，待價而沽。敵敵畏係殺蟲劑，聽個名已經得人驚，六六粉亦不遑多讓，係禁用農藥，食咗會影響腦部功能，呢啲根本唔係乜嘢農藥，簡直就係毒藥。

大家可能會問，內地黑心奸商以毒製薑，無錯係喪盡天良，但關香港乜事呢？嗱，唔係嚇大家，本港業界表示，本港近八成薑來自山東，唔驚就假。正如醫學界人士話齋，禁用農藥一旦滲入薑嘅表層，就難以清除，而且難以識別，恐怕毒薑已流入本港。

本來呢，蔬菜入口須經抽驗，理論上當局冇驗出毒薑，即係冇事。之但係負責把關嘅食環署做嘢有幾疏懶，有幾失魂，大家唔係未領教過。蘇丹紅蛋、孔雀石綠魚、三聚氰胺奶、哮喘豬、毒菜心……食環署有邊次唔係後知後覺吖？今次內地爆發毒薑危機，邊個敢擔保香港唔會出事！

食環署又點講呢？佢哋話喎，所有內地供港蔬菜均來自註冊菜場，自○九年至今年三月，當局總共抽驗三百七十個薑及薑製成品樣本，全部合格咁話。食安中心仲話，去年共抽驗咗二萬一千幾個蔬菜樣本，合格率達九成九添。

真係唔講猶自可，一講把幾火。內地爆出毒膠囊醜聞，當局夠拍晒心口話毒膠囊藥物無喺香港註冊啦，結果咪又係出事。

至於講到食安中心嘅抽驗咯喎，更加兒戲到你唔信。呢，環保組織化驗多間大型超市嘅十二個蔬菜樣本，發現「濫藥」情況嚴重，其中一個樣本甚至含有十二種殘餘農藥添。食安中心次次都話冇事，但環保組織或傳媒一驗就有問題，你話係咪奇怪吖！

一句講晒，官僚靠得住，豬乸會上樹。周一嶽，毒菜毒薑殺埋身，如果你把關又失職，小心被拍薑咁拍吖，叮！