政壇：政商定格：袁莎妮笑住祝福唐唐
為慶祝成立紀念日，香港總商會喺本月二十九日又免費請市民乘搭電車同兩條渡輪航線，預料約三十萬人受惠。總商會主席胡定旭同總裁Shirley袁莎妮尋日就孖住出嚟推銷今次活動，仲叫齊三十幾個參與團體代表撐場，但Shirley依然係活動嘅主角。
近日唐唐話會思考未來路向點走，又有傳佢會退出政壇，選擇其他崗位繼續服務社會，問Shirley點睇前上司唐唐嘅未來路向？佢就大笑兩聲答話：「佢有自己一套諗法，無論佢做乜嘢，作為佢過去嘅下屬，我都會祝福佢嘅！」
咁唐營支持者肥胡會否續任下屆醫管局主席？佢就話任期去到年底，依家講續約係言之尚早，之後仲大耍「太極」叫大家唔好問佢呢啲嘢，應該寫多啲電車喎，跟住極速竄入升降機鬆人。
袁莎妮話無論唐唐未來做乜嘢都好，都會祝福佢喎！