政壇：泛民拉布冇影抽水最醒
立法會明明有二十三名泛民主派議員，但今次反出缺機制草案拉布戰，來來去去只係見到「拉布四子」輪流發言，即係人民力量黃毓民、「大舊」陳偉業、社民連「長毛」梁國雄及獨立議員鄭家富。至於白鴿黨、公文袋、民協等議員就大部分時間變晒失蹤人口，就算主席曾鈺成尋日朝早宣布腰斬辯論，佢哋依然係唔見影。
塵埃落定先出現
直至六個鐘頭後，當所有嘢都塵埃落定，呢班所謂泛民先至凸個頭出嚟，聯署咗封信話要強烈譴責曾鈺成，仲話對曾主席嘅裁決感到震驚同憤怒。
佢哋嘅選民就真係唔慌唔憤怒喇，點解當初曾主席提出腰斬辯論嗰刻佢哋唔及時阻止呢？莫非連表態都唔敢？聰明嘅選民一定唔會就咁放過呢班抽水議員，相信要佢哋喺九月立法會選舉票債票償。