政壇:貪曾搵大班度橋避彈劾?

本來貪盡海陸空嘅煲呔曾要面對被立法會彈劾嘅議案,點知畀出缺安排條例草案「拉布戰」阻延。但係天網恢恢,立法會主席曾鈺成尋日出招「剪布」,彈劾貪曾嘅議案得以重見天日。唔知貪曾係咪心知大限已到,有網民就踢爆佢前晚密會有「煲呔針」稱號嘅鄭經翰,睇怕極可能又坐埋諗埋啲「屎橋」企圖蒙混過關,但自作孽就肯定難逃一劫。有網民爆料,貪曾前晚八點去咗香港數碼廣播搵「曾朋友」鄭大班傾密偈,惹來其他網民議論紛紛,猜度佢哋唔知係咪又想搞局。我哋就密會一事問過傳聞中嘅當事人鄭大班,佢對此事無承認亦無否認,只係話唔認為私人事要同大家交代喎。話時話,鄭大班本身都自身難保,之前被傳媒踢爆佢大宅僭建一事已經搞到一身蟻,睇怕貪曾呢次真係所託非人喇!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報