學童午膳點蟲蟲 美心飯盒多嘢送

「點蟲蟲，蟲蟲飛」，充滿童真嘅兒歌，居然變咗學童嘅噩夢，令人聞蟲色變。太一叮講緊嘅係美心「加料」食品，蟲蟲送不停，禍及小生命。

話說美心集團旗下供應全港多間中小學嘅「原美」品牌學童飯盒，原來名不副實，唔只不美，簡直核突兼攞膽。淨係計舊年十一月起半年內咋，已最少四次被聖公會聖雅各小學發現飯盒附送異物，最近一次仲離譜，飯盒竟然有昆蟲混喺汁液當中，校方為學生健康着想，焗住終止同原美下學年嘅合約。食環署亦承認，曾經接過涉及原美嘅食物投訴。

咁就奇喇，飯盒有保鮮膠紙密封，送到學生面前至打開，照計蟲蟲冇機會飛入去o架，唯一嘅可能就係源頭出事，即係話食物製作過程唔乾淨，問你怕未。不可不知，原美係本港大型學童午膳飯盒供應商之一，市場佔有率超過兩成，連唔少傳統名校都幫襯，食物衞生咁鬼兒戲，核突事小，影響學童健康事大，家長唔驚就假！

話時話，聖公會聖雅各小學踢爆嘅美心食品問題，可能只係冰山一角嘅咋，好多學童打開飯盒就食，就算中咗招都唔知喇。唔係嚇你o架，美心集團旗下食肆食物「加料」早就唔係乜嘢新聞，流沙奶黃包送曱甴幼蟲、三鮮燴麵送臭蟲殘骸、油菜送甲蟲屍體、豬扒飯送長頭髮、可樂送疑似鹽蛇、荷葉飯送斷匙柄等等，簡直無奇不有。資料顯示，美心違反《公眾衞生及市政條例》嘅定罪紀錄有近百項，其中至少廿八項涉及食品加料，淨係今年，美心集團已被法庭罰款三次。最駭人聽聞嘅係舊年六月，有市民喺沙田一間美心分店買咗低糖凍綠茶，飲飲吓至發現口含曱甴，幾乎吞咗落肚，真係諗起都作嘔。

講開又講，食物加料，肉眼見得到，都仲比較容易提防，如果細菌超標咯喎，咁就防不勝防喇。呢，舊年底之嘛，美心一間中式酒樓嘅蘿蔔糕被食安中心驗出致病菌超標近二百八十倍；而環保署上月公布嘅三月份檢控數字，再揭發美心旗下食肆八月軒非法安裝火爐污染空氣，罰款了事。

講到底，美心食品衞生問題多多，劣迹斑斑，投訴幾乎厚過電話簿，而且屢犯不改，加料不斷，皆因港府執法不嚴，懲罰太輕。正所謂，禁而不止，則刑罰侮，如果衞生當局仲唔執正嚟做，加重刑罰，只會有更多市民中招，遲早爆大鑊嘅咋，叮！