SUN微博：打橫嚟講：廢物有價 垃圾增值

呢個香港廢柴政府，畀人日鬧夜鬧都未知衰，竟敢提出自加人工，真白癡到超佢滷味雞！

那個林公公徒弟的政制及內地事務局局長譚志源仲話今次問責官員的加薪建議之幅度溫和，並暗示佢哋十年無加過人工，依家追番少許，好應分喎！你食蕉啦！

一班垃圾不如的渣滓，動輒三、四百萬一年，貴過胡錦濤加溫家寶，多過奧巴馬，大佬，佢哋管地球o架！香港呢班粉皮，連國防外交也不用過問，何須咁很高薪呀？人家一個省長管理的人口，不會比香港少，何解你班契弟咁很貪心，想博懵加人工？

香港政府官僚作風，總愛量化計算，例如新公公譚志源擲出大堆統計數字，說甚麼百分比，點數後幾多個零之類，講到佢哋只加八點一，十分委屈！你食藥未呀？呢班粉皮斗零都唔值啦！只是當年老董懵上腦，畀佢哋跣鑊，不知起薪點過高之嘛！何解唔睇做嘢嘅質素，將薪金可加可減？

淨係班垃圾政治助理，就全部可以拉去打柴！十六萬一個月，佢哋有何貢獻呀？預佢哋去跟議員溝通，推銷政策？笑話啦！要傾都找局長啦！連副局長都無人理啦！真正懂，講得兩嘴的，應是公務員的常秘，但人工不及啲垃圾問責官員多，反智嗎？

仲有，只要局長高興，低學歷、無經驗的，都可做佢政治助理，咁嘅政治分贓，叫人如何服氣？真佢滷味蘭花臭蟹！食啦！粉皮！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府