政壇：政商定格：何光耀開發鑽飾行情App
鑽石恒久遠，所以係情人間饋贈嘅最佳禮物之一。不過，一般鑽石都價值不菲，My Jewelry愛飾珠寶老闆何光耀（Mark）年前就喺紅磡開咗間樓上舖賣超值鑽飾，賣嘅鑽石比市價平一截。阿Mark解釋，佢係套用地產公司嘅營運模式，做鑽石供應商同顧客嘅中間人，只賺百分之四至五盈利。雖然賺少啲，但就大受歡迎。
做呢行咁耐，佢都觀察到男女客人唔同嘅消費心理。佢話，男士較理性，鍾意物有所值，多幫襯樓上舖；而女性則較感性，鍾意即興購物，所以會光顧門市。為咗推廣鑽石，與時俱進嘅阿Mark去年仲開發咗個智能手機應用程式（App），入面有晒每粒鑽石嘅證書同國際市場價格，仲教大家點揀靚鑽石，唔少顧客同行家都爭住下載添！
何光耀話賣鑽石賺少啲一樣有得做。