政壇：搞搞政：鬍鬚曾訪台 遇港生柴台

特區政府話同台灣增進合作多時，實際進度卻令人擰頭，財爺鬍鬚曾日前率領多名港府官員，分別以「港台經濟文化合作協進會」嘅唔同職銜訪問台灣，尋日仲喺台北為香港經濟貿易文化辦事處舉行開幕儀式。不過，鬍鬚曾去到邊都畀人柴台，尋日就遇到喺當地讀書嘅幾名香港學生抗議，雖然佢哋嘅抗議牌係寫住「曾蔭權不代表香港」，但曾兄弟鬍鬚曾都夠晒尷尬。

本來尋日嘅開幕儀式吸引近百國際媒體到場，係宣傳香港嘅好機會，但啲學生卻先喺鬍鬚曾一行落車嘅地方抗議，到儀式結束後，鬍鬚曾一行轉往書店出席另一活動時，學生又再轉移陣地，結果被保安人員暴力相向，學生更被強力拉扯、拖行，事後有學生身體多處受傷，揚言會依法入稟法院。

鬍鬚曾尋日喺台灣都學人送禮，宣布九月起台灣居民可喺網上免費預辦入境本港嘅登記，方便台灣居民入境。不過，台灣方面嘅官員卻早喺佢送禮前已敦促港府應盡快畀台灣居民免簽證入境香港，明顯對港台關係嘅進展未感滿意。