政壇：建制派帶法寶通頂剪布

立法會過去兩個禮拜不斷上演流會、拉布戰，建制派議員被迫諗橋「剪布」，無計可施下，唯一辦法就係焗住今晚通宵開夜車陪玩拉布，其中建仔、工聯會已決定誓死陪玩通宵，但「五散人」林大輝同「怪醫」梁家騮就唱反調，大輝更慨嘆開通宵等於「癲鳳鬥狂龍，一鑊熟」。

尋日傍晚，立法會主席曾鈺成宣布鑑於約有三十三位議員贊成開夜車，所以今晚會通宵開會。不過，佢亦考慮到發動拉布嘅人民力量同社民連反對開通宵，所以除咗設食飯時間外，通宵期間都會適當放小息。工聯會王國興尋日一邊鬧，一邊公布佢嘅通宵法寶，話會帶備九宮格紙、毛筆同墨繼續喺議事廳寫書法；至於「五散人」陳健波就話帶定鬧鐘，慎防小休期間瞓過龍；旅遊界謝偉俊就預備輕裝上陣，帶備文件做嘢。

大輝話通宵等於「飲砒霜、兩敗俱傷、唔理性」，怪醫更講明今晚大約十點鐘鬆人，唔會陪大家癲喎。發動拉布嘅人民力量黃毓民呼籲支持者今日下晝四點開始去立法會通宵聲援佢哋，仲話佢哋訂場訂到禮拜五晚十點鐘，睇嚟拉布戰今晚又會掀高潮。