政壇：大好友張華峰沽港交所
國際金融市場波動，港股連跌八個交易日，「缸湖」中人都好無奈。一向係港交所「大好友」嘅恒豐證券董事總經理張華峰最近都「變心」，沽出手上一部分港交所股票，雖然仲剩低部分，但大好友都心淡，唔係冇啟示作用o架。
張華峰唔肯披露數字，只係話眼見港交所近期嘅連串動作，從一個股東立場同期望嚟睇，係有所偏差。
近期港交所大灑金錢去投資，除咗斥資近三十億元革新技術外，好似興建數據中心、大搞設備託管服務等，仲話要收購倫敦金屬交易所（LME），張華峰覺得，呢連串舉動都係風險大過利益同回報。
今個月二十四號，張華峰會率領香港城市大學學生會出訪北京，屆時見吓啲老朋友，近期有風吹七一中央又送大禮，張華峰話，到時順便「收收風」。