政壇：高錕訪癡呆症中心練書法
諾貝爾物理學獎得主高錕教授年前患上老年癡呆症後，身體機能都有退步，日前「光纖之父」同太太黃美芸到訪仁濟醫院屬下老年癡呆症服務單位「嚴徐玉珊卓智中心」。高教授喺職業治療師嘅指導下，體驗專為老年癡呆症患者提供嘅認知及導向訓練，包括參與做早操同寫書法，佢表現得好投入同專注，連高太都話好耐都未見過高教授喺新環境下表現得咁開心喎。
高錕夫婦喺仁濟副主席嚴徐玉珊同蘇陳偉香等人陪同下參觀中心，身為高錕慈善基金會主席嘅高太話，期待同仁濟就老年癡呆症服務嘅協作同發展作進一步探討。為答謝高教授到訪，中心向高氏夫婦送贈一對由中心長者會員製作嘅天鵝擺設，寓意佢哋同德同心、笙磬同音。
高錕喺卓智中心職業治療師陪同下練習寫毛筆字，訓練專注力同手眼協調能力。（受訪者提供）