政壇：田二少教鄉紳文明抗爭

鄉議局因新界村屋僭建問題同夕陽政府拗到面左左，鄉議局部分激進鄉紳之前更將矛頭直指發展局局長林鄭月娥，一度火燒林鄭嘅紙紮公仔洩憤，亦有鄉紳左一句「流血」、右一句「誓死保衞」，搞到唔少市民對鄉紳甚至鄉村居民多咗一份反感。主導鄉事發展嘅鄉議局似乎都感覺得佢哋嘅形象低落，近期更疑似知衰，決定搵某時裝品牌老闆田北辰教鄉紳改善形象之道。不過，田二少以前做九鐵主席都試過被逼宮，呢次做形象導師，到底係泥菩薩過江定係猛龍過江呢？大家要拭目以待嘞。

眾所周知，政圈人士嘅形象要年月累積，懂得語言嘅藝術甚至可以化腐朽為神奇，但呢兩方面恰巧係部分鄉紳最缺乏嘅嘢，部分鄉紳開口埋口「公民抗命」、「流血革命」，令人嘩然之餘，仲惹反感添。唔知係咪鄉議局主席劉皇發同一眾高層知道長此下去唔掂，所以本月二十六號就舉辦主題為「形象規劃與待人接物」嘅講座，邀請著名時裝設計師文禮賢同田二少做主講嘉賓。

九鐵兵變政界罕見

田二少嘅品牌老中青都有捧場客，加上佢成日着自家品牌做宣傳，對要重新規劃形象嘅鄉紳有一定參考價值。不過，衣着包裝到謙謙君子都好，笑傲政圈最主要都係待人接物同社會溝通能力，講到呢瓣，田二少就未必係鄉紳嘅最佳楷模嘞，事關佢做九鐵主席時發生「九鐵兵變」事件，係本港政界以至公共機構都好罕見嘅事，涉及嘅問題包括管治思維、管理模式，甚至上下溝通都出咗事，所以，鄉紳學嘢都要擇優而用。

另外，發叔尋日都被問到會唔會服務新政府嘅行政會議，年逾七十五歲嘅佢坦言：「我咁大年紀唔會邀請我入去（行政會議）吓話？」究竟發叔此舉係有自知自明吖，定係以退為進？大家自己解讀囉。