周一嶽無法無天 僭建黨又添一害

夕陽政府死不悔改，真係冇得救！

東方報業集團上年五月揭發曾蔭權帶頭僭建醜聞，轟動全港，港府高層一時風聲鶴唳。勢估唔到，喺僭建醜聞一周年嘅日子，又有高官被踢爆違例僭建。特衰政府誓要「衰到最後一分一秒」嘅決心，簡直令人嘆為觀止。

僭建風暴搞到滿城風雨，居然仲有高官知法犯法，到底邊個咁膽大包天、厚顏無恥呢？登登登凳，就係人稱「每周一鑊」嘅食衞局局長周一嶽，叮！

上年六月，記者巡察過周一鑊位於港島加列山道嘅住所，當時發現外牆正進行維修工程，但係近日再到上址了解，發現周一鑊屋企嘅兩個開放式露台被完全圍封，變成寬闊玻璃窗。就係咁，估計周一鑊可以「偷」多一百八十平方呎樓面面積。

露台圍封僭建，係咪好熟口熟面呢？冇錯，煲呔曾祖屋僭建，又係玻璃窗圍封露台。呢兩主僕為官一樣咁無能、咁卸膊，連僭建嘅手法都同出一轍。最搞笑係，煲呔曾當初以「直覺上認為冇問題」死撐，周一鑊嘅狡辯亦都差唔多，話「問過朋友就話合法」喎。

喂，僭建係違法行為，乜有懷疑唔係應該問專業人士嘅咩？太一叮可以講，如果個個業主「問朋友」嚟決定係咪僭建，一定天下大亂！周一鑊，雖然你尸位素餐，但話晒係堂堂局長，唔該唔好講埋啲咁狗屁不通嘅大話！

嗱，太一叮淨係講兩件事實。第一，根據法例，樓宇改建或加建須向屋宇署提交申請圖則，而記者翻查屋宇署紀錄，發現周一鑊並無相關文件，即係話，佢根本無依法向屋宇署入則申請。第二，註冊工程師指出，周宅嘅圖則顯示，露台本來設有以生鐵造嘅欄杆，但係依家欄杆被拆走，開放式露台亦明顯被圍封，若改建前未得屋宇署批准，即屬違例。證據確鑿，周一鑊你死撐得幾耐呀？

叮佢個鎯鎯，圍封露台唔止違法，更加潛在重重危機，一來封死火警逃生之門，二來露台變廳房，承托重力大增，或會不勝負荷釀成巨禍。周一嶽為官渾渾噩噩，將市民最重要嘅「生老病死」問題搞到一塌糊塗，無日無之嘅醫療事故更加害人無數。家陣連僭建都要隨時累街坊，市民唔通同佢有十冤九仇？定係港府高官根本個個都係官場僭建物，留低喺度只會害人害物？

計太一叮話齋，高官一個二個掛住做僭建俱樂部會員，徇私枉法，香港邊可能唔烏煙瘴氣吖！好彩，夕陽政府時日無多，周一鑊鐵定會被叮走，香港人有番啲希望喇，叮！