SUN微博：Sun畸事：教科書電子化陰謀

教育局捍衞教科書價失敗，副局長安仔見狀，急指教育局積極考慮，於2014年引入電子課本。書商聞言色變，即找來安仔密斟。

書商：喂喂阿安仔，你之前係咪淨係申請咗做立法會秘書長呀？冇申請其他吖？

安仔：冇呀，做咩？

書商：冇，見你咁積極推動電子課本，我哋以為你申請埋環保局局長啫。

安仔：喂喂，你都畀我同市民交代吓啦。我話過要減書價，都畀你哋加番4%啦。

書商：我哋睇長遠嘅，唔係今年幾多個%嘅問題。我哋對資料準確嘅要求好高，舊書資料有錯，就要用新書改正。你都唔係唔知科技日新月異、歷史就要睇時勢、語文就要改「的的了了麼麼」㗎啦。

安仔：電子書更新咪仲方便？你哋可以照做你哋嘅更新王㗎。

書商：啲學生用晒電子書，咁以後有更新，佢哋㩒吓個掣就得啦，咁我哋仲點玩印新書、叫啲家長買新書喎？

安仔：咁咪唔好更新資料囉，整多啲動畫卡通，第一年就好似啲補習社咁「全高清教學」、第二年再加埋粵普配音、第三年再玩埋4D；總之你哋諗計，用盡啲機嘅記憶體，啲學生嫌啲機慢咯，家長就要「更新」啲機啦。

書商：……老老實實，你有冇申請去做資訊科技局局長？

安仔：嘻嘻……秘密。

（花生友如有對號入座，請食自己）