政壇：長毛放氣球付千元清潔費

工聯會王國興喺上個禮拜立法會續審替補機制草案期間，將幾張用毛筆寫嘅大字報貼喺會議廳外、主席曾鈺成嘅畫像隔籬。社民連議員「長毛」梁國雄見大字報貼咗幾個鐘都未畀人撕走，於是有樣學樣，貼上一班網民惡搞建制派嘅二次創作，最後要勞煩清潔工人幫佢逐張逐張摵番落嚟。立法會秘書長Pauline吳文華話可能會問長毛追收清潔費，佢又透露長毛之前喺會議廳入面放氣球，秘書處都收咗佢一千蚊氣球清潔費。

幾個月前，長毛趁財爺喺會議廳宣讀預算案時，將一個寫住「全民退休保障」嘅橙色大氣球緩緩放上半空。Pauline憶述，長毛個氣球當時卡咗喺圓形天花板中間，秘書處一度為點樣攞番個氣球落嚟而費煞思量，最後決定搵清潔公司幫手收拾殘局。佢又話秘書處之後基於「用者自付」嘅原則，向長毛收取一千蚊嘅清潔費。唔知今次秘書處又要佢賠幾多錢呢？