政壇:搞搞政:地政總署跣林鄭

政府早排出手打擊元朗荔枝山莊霸佔官地個案,發展局局長林鄭月娥信誓旦旦話唔會容忍「先斬後奏」,絕不批出短期租約畀啲先霸地、後申請嘅人。言猶在耳,但原來局長都有睇漏眼之時。

舊年開始刮起反僭建風暴,新界鄉議局副主席林偉強畀人揭發霸佔佢喺坪洲祖屋正門外嘅官地。事件曝光,加上有人向地政總署投訴,政府為咗息事寧人係咁意審批吓,竟然喺去年七月批出短期租約。簡而言之,林偉強霸官地嘅行為自此就被合法化。呢種處理手法,好明顯同局長所講嘅截然不同。究竟點解會咁?真係希望局長問番地政總署。

政府部門特別善待林偉強唔只一單,好似民政事務總署最近委任各區嘅撲滅罪行委員會時,將本來已經失去晒所有地區公職嘅林偉強,委任入離島區撲滅罪行委員會,反而現屆坪洲鄉事委員會代表同區議員就無份,呢個決定惹起地區人士不滿。

尋日試過打畀林偉強,但冇人接電話,而現屆坪洲鄉委會主席黃漢權就話:「有正常智慧嘅人一睇就知乜事啦,唔使我多講。」

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

(設計圖片及對白)