政壇：貪曾陰濕招避彈劾

立法會連續兩個禮拜搞拉布，亦連續兩個禮拜流會，唔少人都覺得係人民力量打消耗戰，但其實最大得益者好可能係煲呔曾。

人民力量早已講明會拉布，政府其實有辦法化解，但佢哋遲遲唔肯抽起出缺安排條例草案，搞到排喺後面嘅法案塞晒車。有政壇高人分析，今次拉布根本係煲呔嘅精心製作，一心一意要拉布「拉到最後一分鐘」。

拖慢架構重組

點解咁講？因為原本立法會喺呢個星期三將會首次辯論彈劾貪曾動議，雖然未必通過，但煲呔曾身為史上第一個被啟動彈劾機制嘅人，咁搞法好樣衰，所以佢暗地支持拉布，而星期三恢復拉布，動議無可能如期舉行，繼續咁拉布，個彈劾動議可能押後到七一先辯論，到時佢已經拍屁股走人，仲彈劾乜鬼喎！

拉到七月對煲呔曾有乜着數呢？眾所皆知佢向來唔喜歡CY梁振英，如今拉吓拉吓，好可能會拖慢新政府架構重組進度，令CY唔可以七一換屆前風風光光以新班子上場，因為推行新政，就即係打煲呔曾一巴。

唔單止政府架構重組，陰謀論仲話煲呔曾唔介意本來要喺呢個立法年度要處理嘅草案留畀下一屆，例如有網絡廿三條之稱嘅版權修訂條例草案，好可能都會押後處理，咁搞法即係將個波推畀下屆政府，屆時政府一推，就屈CY打壓網民囉。

跟住仲同競爭法、規管銷售一手樓等草案，全部係針對工商界，今屆會期搞唔掂，下屆又要從頭開始，唔止費時失事，仲可以將佢自己嘅舊包袱，加諸新政府。