老爺（車立）監管甩漏 跛腳鴨草菅人命

香港都市陷阱處處，危機四伏，出門真係要打醒十二分精神。呢，一個唔好彩搭正「跳樓（車立）」，嚇餐飽事小，隨時連命仔都冇埋。唔怪得舊年底公布嘅中國最安全城市排行榜，香港連前三十名都入唔到，認真羞家。

講開跳樓（車立），呢樣嘢早已見怪不怪咯。上個禮拜之嘛，深水埗有人被困屋內，消防員接報到場施援，點知上樓時部（車立）突然掉頭向下，直墮槽底，要靠同袍協助至逃出生天，救人變被救，你話幾搞笑呢。好彩當時唔係去救火咋，否則後果可大可小o架。出事嘅升降機已經有三十幾年歷史，唔使問阿桂，多數係因為老爺（車立）機件殘舊，欠缺保養。

呢宗意外教訓當局，如果監管唔到位，維修保養又不足，今次就話玩殘消防員啫，下次隨時搞出人命都有之！

咪以為呢次係個別事件吖，本報記者巡查咗本港多幢舊樓嘅升降機，真係唔查猶自可，一查把鬼火。原來當局對升降機嘅所謂監管，只係得個噏字，求求其其，甩甩漏漏。嗱，法例規定升降機內必須張貼有效嘅升降機檢驗及測試證明書，行內俗稱「行車證」，點知好多升降機根本見唔到呢啲行車證，就算有，亦只係裝假狗呃人，文件過晒期，同廢紙冇分別。叮，咁都可以過骨，你話機電署巡查及監管幾兒戲吖！

更得人驚嘅係，升降機安全事故無日無之，斷纜、墮（車立）無奇不有，而當局對違規承辦商竟然束手無策，只能夠聽之任之。機電署承認目前並冇停牌制度，而評級制度亦只係反映承建商嘅表現，唔會界定佢哋合唔合格喎。即係話，就算承建商做得幾差，事故幾多，當局都吹佢哋唔脹，最多係咁意罰少少錢算數。港府好似無牙老虎，承建商梗係肆無忌憚喇，有承建商年檢安全評級只有二十分，等同「肥佬」，但照樣繼續營運，簡直匪夷所思。

唔講唔知，現行升降機法例原來係上世紀六十年代制訂嘅老皇曆，早就不合時宜，當局話就話要修訂，點知一拖再拖，新法例舊年至提交立法會，唔知幾時至可以通過。

法律又舊，監管又唔夠，唔出事至奇。跛腳鴨政府草菅人命，官僚辦事得過且過，升降機驚魂鑊鑊新鮮鑊鑊甘，難為煲呔曾仲大大聲話「意外一次都嫌多」，真係不知所謂。計太一叮話齋，呢啲尸位素餐、無所作為嘅庸官，一個都嫌多就真，叮！