政壇：政商定格：王國潼父子潮推二胡文化
著名二胡大師王國潼同「二胡王子」王憓（Ray）呢對父子檔，為紀念一代宗師劉天華逝世八十周年，將喺月尾同下月初分別舉行二胡示範講座同演奏會。王國潼話來港二十幾年，發覺唔少港人都愛聽二胡，兩父子於是落力推廣二胡普及化，阿Ray仲將傳統音樂加入R&B元素，吸引更多年輕人玩。
王國潼笑稱二胡畀人嘅形象低俗，好似街頭賣藝，但近期日本、新加坡、台灣等地捲起二胡風，唔少年輕人爭住學，好似阿Ray任職理事長嘅二胡藝術中心，大部分學員竟然係日本小朋友。盡得爸爸真傳嘅阿Ray，兩歲半起就用鐵罐當二胡拉，五歲正式學習至今。原來阿Ray已四十歲，係咪音樂令佢常葆青春呢？
王國潼（左）同阿仔王憓將再度父子檔演出，推廣二胡文化。