政壇：政商定格：梁高美懿退任恒生CEO

恒生銀行尋日嘅股東大會，焦點都放喺梁高美懿身上，皆因佢正式交棒畀李慧敏（Rose），退任副董事長兼行政總裁。過咗三十四年銀行家生涯，有小股東更大讚梁太尋日特別明艷照人。尋日佢着桃紅色套裝，真係幾搶眼o架！

梁太帶領恒生走過金融環境動盪嘅三年，有小股東就話好多謝佢嘅貢獻，但就有啲擔心咁問，之前滙豐精簡架構搞到員工士氣低落，依家Rose由滙豐空降，會唔會將呢種氣氛帶埋嚟恒生呢？梁太就對Rose投下信心一票，話同佢相識多年，知道佢係非常有經驗嘅銀行家，而Rose尋日先上任，叫大家畀個機會佢發揮。

佢話同恒生嘅關係唔會中斷，皆因佢仲係恒生嘅客戶同股東。有股東要求增加派息，佢話希望持有嘅股票穩陣為先，好相信恒生董事會嘅決策，更何況董事會有滙豐嘅人，適宜派多啲息點會唔應承呢。