政壇：搞搞政：大輝Jeffrey爭做唐唐代言人

唐唐上禮拜去咗美國探囡囡，佢嘅「家臣」、立法會議員林大輝前日話唐唐會全面退出政壇， 但唐唐另一忠實支持者、經濟動力嘅林健鋒（Jeffrey）尋日就話冇咁嘅事，唐唐唔會退出政壇。做乜佢哋搶住做唐唐嘅代言人、鬥傳聖旨咁嘅？

Jeffrey話喺選舉結束後，同唐唐食過兩、三次飯，唐唐都係話放完假睇睇先，再決定動向，完全冇抱住「咪搞我」嘅心態，唐唐仲係有心服務香港咁話。佢仲話：「我覺得你哋以後會成日見到呢個人（唐唐）出現。」佢咁緊張搶住幫唐唐「大平反」，澄清佢唔係退出政壇，莫非佢想招攬唐唐入經濟動力？佢就話「唔排除一齊做啲嘢」喎。咁搞法，唔通佢想取代大輝做新「家臣」﹖

話時話，唐唐最近發咗封信畀選委表示感謝，信嘅結尾仲話；「衷心感謝，今天如此，永遠如此。」又話感謝信好難落筆，所以到最近至寫。