政壇：鍾樹根「升Cup」橫額瘋傳
九月就係立法會選舉，各式嘅騎呢宣傳海報同橫額紛紛湧現各區街頭，暫以東區區議會主席鍾樹根嘅「升級」橫額最搞笑。
鍾樹根當選區議員多年，今屆仲做埋區會主席，但喺所屬政黨排隊參選立法會，排到頭髮白埋都未輪到佢，最後要威脅退黨至爭取到出選。近日佢喺港島多區換上新橫額，上面寫住「係時候升級」五隻大字，其中「升級」二字更係超大版，相信係想話畀啲街坊聽，佢係時候由區議員升級做立會議員喇！但可能為免講得太明要計選舉開支，又唔敢直接提立法會三隻字，最後唔知佢想講乜。
呢張騎呢橫額掛咗唔夠兩日，就畀有口話人冇口話自己嘅白鴿黨對手當作笑話咁喺網上瘋傳，笑鍾樹銀想「升Cup」豐胸，又揶揄佢係「千年老二」，點搞作都唔會做到立法會議員。
鍾樹根嘅橫額被譏笑似豐胸廣告多過宣傳選舉。（互聯網）