政壇：陸志聰廣華流第一滴淚
雖說「男兒流血不流淚」，但廣華醫院一九六一年「出品」、長大後仲做過廣華醫院行政總監嘅現任瑪麗醫院行政總監陸志聰，唔介意分享「那些年」首次畀人整喊嘅經歷。
佢話最難忘○二年出席最後一屆廣華醫院護士學校畢業禮，畢業生當時唱起名DJ麥潤壽嘅首本名曲《在晴朗的天空下》其中一句：「一早決心，將我愛笑的心，感染世上愛哭的人……」佢就覺得護士喺幫病人嘅過程，內心應該得到快樂：「我以為自己好硬淨，第一次忍唔住喊！」
護士們除咗識餵藥，仲煮咗鍋冇豬肝、豬腸嘅「衞生及第粥」畀大家食，識飲識食嘅陸醫生都唔介意：「食個心意都足料啦！」
