政壇：晒功績報大數 Eva禪心未參透

夕陽政府就嚟換屆，運輸及房屋局局長鄭汝樺（Eva）日前畀人問到去留問題時，引用唐代詩人李翱嘅禪詩「雲在青天水在瓶」，暗示知道乜嘢至最啱自己，好似乜都睇化晒咁，點知尋日立法會通過沙中線撥款後，佢就主動咁數自己任內嘅功績。佢話呢五年嚟佢哋得到立法會超過二千億元嘅撥款，令「一橋、五鐵、三主要幹道」都可以成功動工，創造咗超過五萬六千個就業職位咁話。

不過，Eva一講完就畀人窒，話佢任內重運輸、輕房屋。佢就即刻反駁，話佢哋當然有切切實實繼續發展公屋，亦有就復建居屋下工夫，一手樓銷售規管法例亦做緊，顯示佢哋都好注重房屋咁話。

房屋政策一鑊泡

咁講就唔係咁公道喇，唔少市民都希望政府加快起公屋，解決房屋問題，但政府遲遲冇對策，依然咁多人要住劏房。政府又一直唔肯復建居屋，仲要諗埋晒啲問題多多嘅置安心，搞到民怨四起至「跪低」，雖然話係煲呔曾責任，但Eva主管房屋政策，亦絕對責無旁貸。

規管一手樓銷售嘅法例更加唔使講，依家仲審議緊，都唔知幾時上大會。加上立法會依家就議員出缺安排玩「拉布」，一手樓條例草案係咪可以今屆通過都未知。佢咁快就計埋落自己張成績表度，未免早咗啲喎！

為乜事佢突然轉向邀功，唔通忽然積極考慮留低？咁就只有佢自己至知嘞！但以佢着迹晒功績嘅舉動睇嚟，似乎驚死市民唔知佢任內做咗乜嘢，咁佢都唔係好似自己所講睇得咁化啫！