東方太陽驅黑暗 牛鬼蛇神又現形

天網恢恢，疏而不漏。太一叮始終相信，天道係公平嘅，正義力量係無可阻擋嘅，任何人做咗虧心事，無論佢姓乜名乜，匿喺邊窟，都一定走唔甩。呢嗱，又有辦你睇喇。

正所謂，臭罌出臭草。《明報》母公司世界華文媒體有限公司旗下嘅《亞洲週刊》，其設於「明報網站」嘅「亞洲週刊討論區」，○六年出現誹謗東方報業集團及《東方日報》嘅貼文。東方為追查發放該誹謗貼文嘅網民及幕後黑手，先向《亞洲週刊》興訟，成功取得其網絡通訊位址，尋日高院再批准東方嘅要求，下令有關網絡供應商十四日內交出該網民嘅所有資料，包括全名、身份證號碼、手機號碼及地址。嗱，牛鬼蛇神好快就原形畢露o架喇。

所以話，「犯東方者，雖難必誅，雖遠亦必誅」，蓄意誹謗而且心存僥倖負隅頑抗者，勢必受到應有嘅懲罰。正如法律界人士話齋，唔好以為喺網上就可以亂講嘢，諗住「睇我唔到」、「搵我唔到」，講完乜事都無，其實一定捉到你！

東風吹，戰鼓擂，呢個世界究竟誰怕誰。正義傳媒為討回公道，不惜花費龐大人力物力，可以講係雷霆萬鈞，捷報頻傳。呢，之前東方已成功揪出多名發放誹謗貼文嘅高登網民，佢哋分別刊登道歉啟事，有人甚至要作出賠償；仲有吖，東方前排入稟高院控告「獨立媒體」網站兩篇文章誹謗，結果又勝訴，被告除咗要提供文章發布人嘅個人資料，仲要向東方賠償十萬蚊及支付訟費。呢啲故事教訓所有以暗箭傷人嘅牛鬼蛇神，多行不義必自斃，唔好以為走得甩呀！

講開又講，惡意中傷東方嘅貼文多年來喺網上陰魂不散，呢頭被捉，嗰頭又出現，好明顯係有幕後黑手興風作浪。奇就奇在，流傳全球網站嘅八百幾篇誹謗貼文，中國網站居然佔咗七百幾篇，唔少仲係官方網站，無論東方點樣投訴，內地當局都闊佬懶理，實在匪夷所思。

係人都知，內地對網絡嘅監控滴水不漏，如果冇人包庇，呢啲誹謗貼文根本冇可能出現。東方報業一向堅持正義，堅持民族大義，回歸前被港英當局視為眼中釘就話唔出奇啫，勢估唔到回歸後一樣備受打壓，內地當局是非不分，縱容牛鬼蛇神利用網絡施放暗箭，令人莫名其妙，唔通真係「精忠報國」冇好報，反中亂港有運行？

點都好喇，東方太陽驅走黑暗，牛鬼蛇神無所遁形。太一叮再次警告，無論誹謗者及幕後黑手係何方神聖，逃到邊度，隱藏幾深，東方都必定追緝到底，不獲全勝，決不收兵。唔信？即管放長雙眼睇吓！