SUN微博：打橫嚟講：從梁班子，擇木而棲

坊間評論，一面倒的，「擔心」候任特首梁振英埋班有困難，說甚麼AO官僚大逃亡，又話CY好得人驚，無人肯跟佢搵食，即使現今傳聞入閣的局長人選，也被批評賣相甚騎呢巖巉無台型，食唔住班政務官之餘，也鬥唔過班議員，未來將會舉步維艱，施政困難！

哼！真係放心啦，以振英哥之城府才志、心思細密、手段利落，深諳籠絡小市民伎倆，加上，願狂派窩心支票，兼西環大勢力在背後戳力支持，怎會有問題？

以振英哥處事謹慎的態度，任何時刻都不會打無把握的仗嘅！嗱！大家記唔記得，特首競選初期，CY一直話未夠提名票入閘啦！最終，咪三百幾票有多，超額完成！如今，江湖冷風又傳佢人手不足，甚至連未夠秤的「紅底大陸妹」亦不放過，以證捉襟見肘之苦況，唉！大家咪咁幼稚啦！你哋睇到嘅嘢，梁營咁把炮，人才濟濟，佢哋又怎會事前唔知吖？咁做，只不過，睇吓邊個勇於出來「保駕護航」，咪自己友囉！君不見當日振英哥「唔覺意」經過民建聯開Party地點，被譚耀宗黑面噴之嗎？家陣，民仔咪死死氣向CY推薦人才？大家都係成熟嘅政客嘛！

今日，一份「從梁」的紅頭文件，應到咗阿爺枱頭，等拍板，只要名單中人，無做過唔見得光嘅嘢，或做咗而不會被揭發的，都有機會埋位。人數？擔保有多無少啦！信我！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係咁爆」網址：tv.on.cc/hot