政壇：政商定格：陳觀展偕下屬弘揚母愛
近期幾個發展商都有新盤出，好似新世界發展咁，沙田車公廟站嘅重點新盤溱岸8號好快就推出，執行董事兼聯席總經理陳觀展正忙於應戰，但尋日喺新世界總部見到佢竟然喺女人堆入面嘻嘻哈哈。大家唔好誤會，佢只係代表公司，提早同班同事慶祝母親節啫！
陳觀展親自走到工作間，為同事送上康乃馨同心意卡，佢話咁做不單只向已為人母嘅同事致敬，感謝佢哋多年嚟為公司同為家庭嘅付出，同時亦鼓勵作為子女嘅同事向母親聊表心意，促進同事家庭和諧。
企業傳訊總經理張一心話唔只母親節有花收，婦女節會有紅棗茶、中秋節有月餅、生日有利是同假期、準爸爸有侍產假，今年初仲成立咗新世界體育會添！
