政壇：搞搞政：真假「梁粉」進軍功能界別

支持CY梁振英嘅真「梁粉」密謀搶攻九月立法會功能界別，為CY日後施政鳴鑼開路，當中挺梁「親兵」、餐飲聯業協會會長黃家和，就可以循飲食界同廠商會二揀一出選，而一班傳統左派亦有意以疑似「梁粉」身份，睇準時機齊齊搶灘參選。

「四大懶蟲」嘅議席係疑似「梁粉」重點出擊嘅目標。有消息指出，最近再次畀人勸退嘅中總代表黃宜弘，據聞好大機會由港區全國人大代表廖長江接棒；而金融界嘅李國寶則好大機會畀曾為臨立會議員、中銀高層吳亮星取代；至於體育界嘅霍震霆亦罕有受到挑戰，對手就係疑似文化局局長、港區全國人大代表馬逢國。

另有消息更指有政壇高人為咗擴大親中勢力嘅版圖，連旅遊界謝偉俊轉戰九東後出現嘅空缺都唔放過，正發揮影響力想力邀中旅高層盧瑞安「出山」參選，但仍有待盧首肯。但無論結果如何，真假「梁粉」全部蒲頭嘅格局已成，未來四年勢必成為一股不可忽視嘅新勢力。