政壇：基金教父愛心湯餵CY

CY梁振英喺競選特首期間面向七百萬市民，走遍十八區同市民零距離接觸，少不免因公忘私冇啖好食。據聞當時競選辦中人都好關心CY嘅飲食狀況，不過咪以為照顧男士三餐係女士專利，原來最着緊CY飲食嘅係有「基金教父」之稱嘅David雷賢達，佢絕對係CY背後一個重要嘅男人。

CY喺上月下旬舉行答謝大會時，自爆喺競選期間成日要喺座駕度食咖喱魚蛋同元朗白糖糕做晚餐，據聞競選辦中人見到CY食冇定時好心痛，不時提醒佢要注意身體，期間David更加對CY愛護有加，見佢太忙會主動買飯盒畀佢食，有時仲會靜雞雞用保暖壺留啲湯水畀佢飲，飲完後又會換另一壺畀佢，認真細心。

事實上，CY同David嘅惺惺相惜並非源於競選期間。據聞一直有寫專欄嘅David，不時將作品用電郵傳畀啲朋友畀意見，幾乎次次都係CY最先回應，一點一滴都令David印象深刻。