政壇：搞搞政：譚志源嘆「家嫂」唔易做

喺舊年「林公公」林瑞麟由政制及內地事務局局長升做政務司司長，拋低一個替補機制畀下手，但當日接到呢個燙手山芋嘅政制及內地事務局局長Raymond譚志源尋日喺一個電台訪問中，就對呢位上手有讚無彈，仲話雖然佢只係接任做咗七個月局長，但已感受到呢個「家嫂」角色並唔易做，可想而之林公公係有幾高嘅統籌能力同團隊精神，簡直備受政務官隊伍尊崇。

咁令人骨痹嘅評語，連Raymond都承認帶有豐富嘅個人主觀色彩，即係廣大市民未必會認同。不過佢話林公公係一位有情義嘅上司，點解佢會知？因為林公公五度做佢上司。點指咁，簡直係佢恩公添啦！

對於林公公唔做官去牛津讀神學，本身都係基督徒嘅Raymond就話唔覺得出奇，因為佢近年都發現林公公嘅信仰成長多咗，至少遇到棘手問題時識得祈禱，交託畀神，佢仲叫林公公要忘記背後，努力面前，向着標竿直跑，面對前路未知更要有信心。