政壇：華夏王亞偉壓力大休息
上個禮拜內地驚傳基金界一哥王亞偉要離開華夏基金，搞到王亞偉概念股散晒，華夏基金仲畀投資者大舉贖回。王亞偉尋日終於親自解釋點解要走，原來啲散戶乜都唔理，淨係跟實佢買，搞到佢擔心班散戶風險太大，連帶做投資決定都受影響，呢幾年壓力真係太大，所以決定唔玩嘞！
王亞偉話已經勸過傳媒，唔好基金經理買乜嘢都大事報道，搞到佢同其他人討論交流嘅報道四圍傳，完全冇晒拋磚引玉嘅效果，最後搞到一舊磚都唔敢再拋。自己郁下都畀人當做焦點，但如果將自己隔絕，又會冇咗投資觸覺……當然，離開華夏仲包括唔認同公司股權轉讓嘅決定，覺得力不從心。
佢係內地公開募集基金界所剩無幾嘅元老級基金經理之一，連續幾年勇奪最賺錢基金經理嘅美名。佢話以後可能唔做公募基金，依家淨係想休息，「希望我對市場冇影響喇！」